ბაკურიანის ძირითადი სამკურნალო ფაქტორებია: მთის ჰავა, მზის ხანგრძლივი ნათება და ულტრაიისფერი სხივების მაღალი აქტივობა. ბაკურიანი განსაკუთრებით სასარგებლოა, თუ გაწუხებთ სასუნთქი გზების დაავადებები, ქრონიკული ბრონქიტი, მეორეული სისხლნაკლულობა, რაქიტი ან ბრონქული ასთმა. მთის ჰაერი დადებითად იმოქმედებს თქვენს ორგანიზმზე: დაამშვიდებს და ტონუსს შემატებს თქვენს ნერვულ სისტემას, გააქტიურებს სისხლის მიმოქცევას და აამაღლებს იმუნიტეტს.

ბაკურიანი ზღვის დონიდან 1700 მეტრზე მდებარეობს და გამორჩეულია სამთო ინფრასტრუქტურით და სათხილამურო ტრასების მაღალი დონით. თხილამურები, სნოუბორდები, თოვლის მოტოციკლები, ცხენები, მარხილები – შესანიშნავი გასართობია თქვენთვის, მნიშვნელობა არ აქვს სპორტსმენი ხართ, თუ უბრალოდ აქტიური დასვენების მოყვარული.

ბაკურიანში შეხვდებით ევროპაში ყველაზე სანახაობრივ სათხილამურო და სნოუბორდის ტრასებს. კოხტა მიტარბისა და დიდველის სასრიალო ტრასების საერთო სიგრძე 29.1 კმ-ს შეადგენს. დიდველზე შეგიძლიათ ღამით სრიალიც, რადგანაც გზებზე დამონტაჟებულია მაღალტექნოლოგიური ფერადი განათებები, ე.წ. „ლედ განათებები“. ბაკურიანში 23 სხვადასხვა სირთულის ტრასა ფუნქციონირებს და ვინც არ უნდა იყოთ, დამწყები, გამოცდილი თუ უბრალოდ მოყვარული, აუცილებლად იპოვით თქვენთვის შესაფერის სათხილამურო ტრასას.